Најдобрите и најочекувани игри во септември

Новиот месец е пред нас, а со тоа и крајот на исчекувањето на најдобрите игри во септември. Независно дали сте по спорт, RPG игри или вртоглава акција, го одбравме најдоброто од најдоброто. Ова се нашите најочекувани игри за месец септември!

Dead Rising – 13 септември

Првата DR игра ве става во улога на Френк Вест и ви дозволува да си ги исполните вашите убиствени аспирации во град преполн со зомби чудовишта. Прошетајте низ бројни отворени и затворени области и искористете го потенцијалот на околината и вашата креативност да се пресметате со хорда од зомби чудовишта каде времето постојано тече и клучни елементи од приказната би можеле да се случат независно дали сте присутни или не. Играта се одликува со нов систем за сочувување игри, поддршка за Native Xbox 360/Xbox One и PlayStation DualShock 4 контролер, 4К резолуции, неограничен фрејм рејт и подршка за 144Hz монитори.

BioShock: The Collection – 13 септември

Задолжителна лектира за (скоро) сите гејмери кои бараат богато и исполнително искуство како во приказна, така и во гејмплеј. Нурнете се во најмрачното дно на човечката генијалност со првите две игри, а потоа предизвикајте го небото со третата. Колекцијата ги содржи сите три Bioshock игри, како и феноменалните проширувања, како за втората, така и за третата игра. Bioshock 1 и 2 имаат поминато низ целосен графички фејс-лифтинг, а доколку веќе ги поседувате игрите преку Steam, надградената колекција автоматски станува дел од вашата библиотека на денот на излегувањето. BioShock: The Collection го отвора океанот и небото за PC, PS4 и Xbox One.

Pro Evolution Soccer 2017 – 13 септември

Неполни две недели до една од нај забавните спортски игри. ПЕС 2017 сеуште не се осмелува да се пофали со демо за PC гејмерите, но затоа ветува дека портот ќе ги задоволи и најзагрижените играчи и нема да го повтори срамот од 2016 година. Независно дали ќе се одлучиме да им веруваме на гласините или не, демото за конзолите е навистина импресивно, а целосната верзија ќе воведе бројни подобрувања како нов систем за контрола на топката, нови лиценцирани партнерства со светски познати класи и стадиуми. Во поглед на графичките подобрувања, очекувајте реалноста да е изградена до тој степен да ќе можете да го забележувате здивот на загреаните играчи на студено време!

Smash + Grab – Септември

Од авторите на Sleeping Dogs ни доаѓа најновиот наслов за мрежно препукување. Алфа верзијата излегува овој месец, а за повеќе детали, дефинитивно упатете се тука!

Divinity: Original Sin 2 – 15 септември

Првата Divinity: Original Sin излезе една од најквалитетните RPG игри и да кажеме дека не очекувавме продолжеток е исто како да кажеме дека сонцето утре нема да изгрее. По уште една успешна кикстартер кампања, Larian Studious ги ангажира услугите на познатиот писател Chris Avellone (Fallout: New Vegas, KOTOR 2), а покрај впечатлива приказна очекувајте и свет поголем, по нелинеарен и поубав од кога било! Освен соло играње ќе имате на располагање и ко-оп за четири играчи, како и сосема нов мрежен мод од натпреварувачки карактер. За крај, да споменеме дека играва месецов излегува преку ран пристап на Steam, односно во незавршена состојба која допрва ќе биде полирана.

NBA 2K17 – 20 септември

Како осумнаесетта игра во NBA 2K серијалот NBA 2K17 целосно се посветува на давање поголема контрола на играчите, а на располагање ги имате модовите MyCareer, MyGM и MyLeague се за да подобро ги пополните огромните кошаркарски чевли и започнете успешна кариера за еден играч или цели организации. Покрај моментните NBA тимови, вклучени се и меѓународни и EuroLeague тимови. Играта ви стои на располагање за PlayStation 3, PlayStation 4, Windows PC, Xbox 360 и Xbox One.

Destiny: Rise of Iron – 20 септември

Четвртото проширување за Destiny се стреми да ја прошири базата од играчи за PlayStation 4 и Xbox One. Приказната се одвива една година по случките во The Taken Kind, а нови оружја и оклопи ќе добивате под банерот на Lord Saladin, како и нов strike, raid и Crucible мод. За тоа дали ваквото нешто е доволно за да се смета како „значителни промени“ за привлекување на старата и свежата хорда од играчи, останува да почекаме уште неколку недели. За да уживате во најновото проширување, меѓутоа, потребно е да го имате и проширувањето The Taken Kind.

Forza Horizon 3 – 27 септември

Третата игра од овој серијал ќе биде сместена во Австралија, а ќе понуди огромен избор на автомобили и отворен свет досега невиден во овој серијал, или барем така се шушка од развивачите. Forza Horizon 3 ќе биде една од пионерските игри која ќе подржува Microsoft’s Xbox Play Anywhere, односно иницијативата за функционалност на крос-платформа помеѓу Xbox One и PC верзијата на играта. Со други зборови: купете игра за PC и играјте ја бесплатно и Xbox One верзијата. Она што нас, меѓу другото, најмногу не радува е и можноста да го возите оклопниот џип, the Warthog, од серијалот Halo.

XCOM 2 – 27 септември

Првата XCOM игра понуди одлични можности за тактички пресметки со вонземните и технолошко-напредните суштества, а втората е маестрална и уште попредизвикувачка надградба на таквото искуство. PC сопствениците го потврдија тоа уште од февруари годинава, а сега е ред на сопствениците на PlayStation 4 и Xbox One. Нападнете од сенките и спротивставете се на вонземните окупатори со подобрена графика и проширен арсенал од способности и оружја, а и тестирајте го вашето тактичко знаење во одличен мулти плеер со генерирани мапи по случаен избор.

FIFA 17 – 27 септември

Најновата FIFA доаѓа за PlayStation 3, PlayStation 4, Windows PC, Xbox 360 и Xbox One и се одликува со нов енџин за реална графика и флуидни анимации, нова лига, нов мод за приказната и нов фокус кон е-спортот. За пофалба дефинитивно изгледа новиот Journey мод кој дозволува да управувате со ѕвезда во подем, па дури и да присуствувате на интевјуа.

Dear Esther: Landmark Edition – 20 Септември

PC сопствениците од одамна ја имаа честа да се изгубат во спокојниот, но напуштен остров каде единствена утеха барате во фрагменти од писмо за „Милата Естер“. Нема тепање, пукање или слична адреналинска акција. Само меланхолично чувство која станува појако со секој направен чекор и со секој збор изговорен. Dear Esther: Landmark Edition излегува на 20-ти септември за PlayStation 4 и Xbox One, а ветува да го прилагоди искуството при играње на конзолите, односно да ја подобри графиката и гејмплејот кој, патем, се состои само од одење и впивање на поезичната убавина на напуштениот остров.

Тоа беше нашата листа, а доколку пропуштивме некоја интересна игра дефинитивно споделете ја со нас! Слатките маки се во чекањето. Ваша среќа е што за овие игри нема многу да чекате!